Thursday, February 23, 2006

இங்கிலாந்து தொடர் - இந்திய அணித்தேர்வு ...

நாக்பூரில் (நாகபுரியில் - தினமணி ஸ்டைல்??) நடைபெறும் இங்கிலாந்துக்கெதிரான முதல் டெஸ்ட் போட்டிக்கான இந்திய அணி அறிவிக்கப்பட்டுள்ளது. தேர்வில் நிகழ்ந்த சில சுவாரசிய (இந்திய தேர்வுக்குழுவிற்குரிய வினோத??) நிகழ்வுகள் இதோ ..

* காயம் காரணமாக அணியில் இடம்பெறாமல் போன யுவராஜிற்கு பதிலாக (வாவது) கங்குலி அணியில் இடம் பெறுவார் என நம்பப்பட்டது. வழக்கம் போல வருங்காலத்தை (!!!) மனதில் கொண்டு கைப்பிற்கும், ரெய்னாவிற்கும் அணியில் இடம் கொடுக்கப்பட்டுள்ளது. தனிப்பட்ட முறையில் கங்குலியின் ஆட்டத்தின் மீது எனக்கு பெரியளவில் ஈர்ப்பெதுவும் கிடையாதெனினும், ஒரு வலுவான அணி உருவாவதற்கு அடித்தளம் அமைத்தவர், பேட்டிங்கில் இவருடைய மறுக்க முடியாத சாதனையயும், வாய்ப்பு வழங்கப்பட்ட கடைசி ஐந்து ஆட்டங்களில் நன்றாகவே ஆடினார் என்பதையும் மனதில் கொண்டு இங்கிலாந்துக்கெதிரான டெஸ்ட் தொடரில் வாய்ப்பு வழங்கியிருக்க வேண்டும் எனவே கருதுகிறேன். டெஸ்ட் தொடருக்கென உறுதி செய்யப்பட்டு விட்ட கும்ப்ளே, லக்ஷ்மணன் வரிசையில் கங்குலிக்கும் இடம் கொடுத்து நல்ல மாதிரியான ரிடையர்மெண்ட்டுக்கும் வழிவகுப்பதே சரி என நினைக்கிறேன்.

* வேகப்பந்து வீச்சாளர்களை பொறுத்தளவில் பாகிஸ்தான் தொடரில் ஜொலிக்காத ஜாகிரும், அகார்கரும் நீக்கப்பட்டுள்ளார்கள். பாகிஸ்தான் தொடரில் அவ்வப்போது ஆச்சரியங்களை கொடுத்த ஆர்.பி.சிங்கும், ஸ்ரீசாந்தும் தங்கள் இடங்களை தக்க வைத்துக்கொண்டுள்ளனர். புதிதாக வி.ஆர்.வி சிங் சேர்க்கப்பட்டுள்ளார், இவர் இந்தியாவின் அதி வேகப்பந்து விச்சாளர் என நினைக்கிறேன். 2007 உலகக்கோப்பைக்கு முன்னர் சில வேகப்பந்து வீச்சாளர்களை களமிறக்கி, பரிசோதித்து, வேகப்பந்து வீச்சை பலமாக மாற்ற இது போன்ற தேர்வுகள் அவசியமெனவே கருதுகிறேன்.

* ஆனால் சுழற்பந்து வீச்சில் பியூஸ் சாவ்லாவின் தேர்வுக்கான காரணம் எனக்கு புரியவில்லை. இந்தியாவில் ஆடும் டெஸ்ட் ஆட்டங்களில் கும்ப்ளே இல்லாமல் ஆடுவது மகா ரிஸ்க்கான விஷயமென்பதும், அத்தகு பரிட்சாத்த முறையில் ஈடுபட தற்போதைய நிலையில் இந்திய அணி ஈடுபடுவது நல்லதல்ல என்பதும், ஹர்பஜனை பொறுத்தளவில் பாகிஸ்தான் தொடரில் சொதப்பினாலும், இந்தியாவின் முக்கிய சுழற்பந்து வீச்சாளர் என்பதில் மாற்றுக்கருத்து இல்லாத சூழலில், சாவ்லாவை அணியில் சேர்த்து கொண்டு வாய்ப்பு வழங்காமல் வழக்கமான முறையில் கழட்டி விடும் வாய்ப்புதான் அதிகமுள்ளது. இரண்டாம் மற்றும் மூன்றாம் டெஸ்ட்டுக்கான அணியிலும் சேர்த்துக்கொண்டு மூன்று சுழற்பந்து வீச்சாளர்களையும் சுழற்சி முறையில் பரிசோதித்தால் நல்லது.

முழு அணி விவரத்திற்கு இங்கே கிளிக்கவும்....

1 Comments:

Anonymous Rishi said...

பியூஸ் சாவ்லா ஒரு சிறந்த சுழற்பந்து வீச்சாளர். Under 19ல் சிறப்பாக வீசியவர். ஆல்ரவுண்டரும்கூட. அவசியம் அவரது திறமை பரிசோதனை செய்யப்படவேண்டும்.

பியூஸ் சாவ்லாப் பற்றிய உங்கள் கருத்து தவறு.

3:09 AM  

Post a Comment

Links to this post:

Create a Link

<< Home