Thursday, February 23, 2006

பியூஸ் சாவ்லா- தேர்வு சரியா?

எல்லோருக்கும் ஜூஹி சாவ்லாவை தெரியும். யாருங்க இவரு பியூஸ் சாவ்லா?- இன்று பல கிரிக்கெட் ஆர்வலர்களுக்கு தெரியாத உத்திர பிரதேசத்து சிறுவர், அனைவராலும் பாராட்டப்படும் காலம் வெகு தொலைவில் இல்லை. 16 வயதிலே இந்திய டெஸ்ட் அணியில் இடம் பெற்றுள்ள லெக் ஸ்பின்னர்- பியூச் சாவ்லா.

இந்த ஆண்டு ரஞ்சிக் கோப்பையை முதன்முறையாக உத்திரப் பிரதேசம் வென்றுள்ளது. இறுதி ஆட்டத்தில் 5 விக்கெட்டுக்களை கைப்பற்றினார் சாவ்லா. அப்போது முதல் இவரது பந்து வீச்சை பார்க்க வேண்டும் என்ற ஆர்வம் ஏற்பட்டது.

கடந்த ஞாயிற்றுக் கிழமை இந்திய சீனியர்கள் கராச்சியில் பாகிஸ்தானிடம் மோதிய அதே தினத்தில், அண்டர் 19 உலகக் கோப்பை போட்டியில் இந்திய சிறுவர்களும் பாகிஸ்தானுடன் மோதினார்கள். பியூஸ் சாவ்லா இவ்வணியில் இடம் பெற்றிருந்தார். இவரது பந்து வீச்சை பார்ப்பதற்க்காகவே சீனியர்கள் ஆட்டத்தை பார்க்காமால் சோனி மேக்ஸிற்கு மாறினேன்.

சாவ்லாவின் பந்து வீச்சு அண்றைய தினம் அதிரடியாக இருந்தது. லெக்ஸ்பின்னர்களிடம் துல்லியமாக பந்து வீசுவதை ( accuracy) நாம் எதிர்பார்க்க முடியாது. கும்ப்ளே ஒரு விதிவிலக்கு. சாவ்லா முதல் பந்திலிருந்து குறிதவறாமல் வீசினார். பந்து நன்றாக திரும்புகிறது. குறிப்பாக அழகான கூக்ளிகள் வீசுகிறார். லாங் ஹாப் என சொல்லப்படும் அரைக்குழிப் பந்துகள் வீசவில்லை. பர்த்தவரை பிளிப்பர் வீசவில்லை. ஆனாலும் வீசும் ஆற்றல் உண்டு என நம்புகிறேன்.அன்றைய போட்டியில் எட்டு ரன்கள் மட்டுமே கொடுத்து நான்கு விக்கெட்டுக்கள் வீழ்த்தினார் சாவ்லா. தொடர்ந்து பேட்டிங்கிலும் இந்தியாவின் மொத்த எண்ணிக்கையான 71ல் 25 ரன்கள் எடுத்து ஆட்டமிழக்காமல் இருந்தார்.

16 வயதில் லெக்ஸ்பின் வீசுவதற்கு அபார ஆற்றல் வேண்டும். முன்பு சிவராமகிருஷ்ணன் 16 வயதில் சிறப்பாக பந்து வீசி இந்திய அணியில் இடம் பெற்றார். ஆனால் அதன் பின்பு அவரது கவனம் சிதறி அணியிலிருந்து வெளியேறும் நிலை ஏற்பட்டது. ஆனாலும் இந்திய கிரிக்கெட்டில் சிவாவிற்கு தரப்பட்ட வாய்ப்புக்கள் வேறு யாருக்கும் கிடைத்திருக்காது. அதற்கான காரணம் ஒரு நல்ல லெக்ஸ்பின்னர் அணிக்கு சேர்க்கும் வலிமையே.

இந்தியாவின் கடந்த கால வெற்றிகளுக்கு சந்திரசேகர் மற்றும் கும்ப்ளே ஆகியோரின் பங்களிப்பு மற்ற எல்லாவகை பந்து வீச்சாளர்களை காட்டிலும் அதிகம். உலக அளவிலும் ஆஸி அணி கடந்த பத்து ஆண்டுகளில் பெற்ற வெற்றிகளை , வார்னே இல்லாமல் பெற்றிருக்குமா என்பது சந்தேகமே.

இந்தியாவில் கும்ப்ளே யின் வெற்றிடத்தை நிரப்ப ஒரு ஆட்டக்காரரை தயார் செய்யவேண்டியது இன்றியமையாதது. சிறுவன் பியூஸ் கும்ப்ளேயின் இடத்தை நிரப்பக் கூடிய ஆற்றல் இருக்கிறது. அதை அவர் எவ்வாறு வெளிப்படுத்துகிறார் என்பது கவனிக்க வேண்டிய விசயம்.

சிவாவைப் போல கவனத்தை சிதற விடாமல் , சிறப்பாக ஆடி இந்தியாவிற்கு பெருமை சேர்க்க பியூஸிற்கு வாழ்த்துக்கள்.

0 Comments:

Post a Comment

Links to this post:

Create a Link

<< Home